吸塵機械人叫得做「機械人」就當然係識自動，呢個亦都係佢同直立式吸塵機或者其他吸塵機嘅最優勝之處，就係我哋旭都唔洗旭，放佢落地下，撳個摯佢就識自己喺間屋遊走吸塵。
基本上佢吸塵嘅原理係同吸塵機吸塵冇分別，只不過有啲型號多左拖埋地嘅功能，內置有水箱同底部有抹布可以拖地。而至於點解佢識得自己喺間屋度遊走，普遍都係有一個導航系統，例如陀螺儀或者LDS激光導航，甚至有啲直接有鏡頭可以辨識到側邊嘅嘢，幫佢sense旁邊有啲咩物品，避開障礙物。LDS激光仲可以連結個電話app，自動紀錄低吸塵機械人行咗嘅路線，萬一佢sense漏咗咩位置就可以補返吸。另外sense得多，佢亦都會自己記住條路線同學習咗條路，以後就易遊走咗之外就可以減低會撞障礙物嘅機會。仲有記得要留意機械人識唔識sense到高咗小小嘅地下，又或者地下有有地毯，佢又識唔識自己走上去繼續吸。
咁究竟比起普通吸塵機，除咗唔需要已經攰到傻，仲要自己落手落腳吸之外，仲有啲咩優勝嘅地方呢？
首先第一個就係機械人能夠吸到平時普通吸塵機吸唔到嘅隱蔽位，例如梳化底、櫃底呢啲。平時呢啲位用傳統吸塵機可能要換吸頭之外，又要踎喺度伸隻手落底真係攰死。。但係機械人就可以自動遊走埋落去呢啲地方自動吸埋，真係幾方便。不過雖然話就話係咁，但係始終吸塵機械人都有一定嘅大細，有啲窄位、窿窿罅罅佢哋都係入唔到去吸，所以唔好以為真係完全唔需要再自己清潔吸塵，始終都係要我哋自己補兩下嘅。
第二就係佢可以預設啟動時間。平時打工仔長時間唔喺屋企，就算有剩餘力氣吸塵，但係成日都唔記得咗。。。預設啟動時間可以方便成日唔係屋企又懶嘅人，set定咗一個時間，就算我哋唔係屋企，吸塵機械人都識自己喺預設時間自動準時開工吸塵，就算你唔係屋企，佢都可以幫你吸乾淨間屋。
不過要留意如果你屋企有寵物就唔太適合買吸塵機械人喇，因為多數嘅機械人都sense唔到寵物嘅屎尿同嘔吐物，咁萬一你屋企隻狗狗真係痾咗屎係路中心，跟住你個吸塵機械人一嘢轟咗埋去，咁個吸塵機械人應該可以唔洗要，你都應該周屋屎架啦。
最後建議大家幾款好用嘅吸塵機械人比大家！
如果你係簡簡單單用到，冇話追求啲好特別嘅功能的話，可以考慮買小米嘅拖掃機械人，大約1500-2000蚊倒。佢底部有一塊抹布同埋吸塵口， 可以同時做到掃地加拖地嘅效果。 因為佢係採用 LDS激光導航， 所以可以連接去到手機app，睇到吸塵機遊走嘅路線，check到有咩位置漏咗掃等等。咁嘅價錢算係幾全能。
第二個想介紹嘅就係roborock石頭嘅T7 pro， 同樣都係有吸塵加拖地嘅功能，比起小米都只係貴1000倒，大約3千幾蚊。佢喺消委會嘅評測入面嘅吸淨能力好高， 導航系統好準確， 令到可以好平均咁清潔倒屋企入邊嘅空間，仲可以清到角落頭嘅位置，透過出風口出風吹起啲塵再吸返入去。
有好多人講起吸塵機械人都會識iRobot呢個牌子，價錢大概都要$5000到even成萬蚊，不過提提大家根據消委會嘅報告，佢嘅總評得分其實都同頭先介紹前幾至3千蚊嘅款式一樣，唔係真係話特別出眾或者效能特別好，所以係咪真係需要買到咁貴，係咪真係值得用呢個價錢買就真係要大家自己衡量喇。
同埋要記住留意返始終吸塵機械人上面嗰塊拖地布都係要自己拆出嚟洗， 吸塵嘅集塵箱都同直立式吸塵機一樣要自己清理，吸塵機械人最主要都係幫你偷懶咗吸嗰一部分，真係好難做到完全100%解放雙手。不過慳咗要周屋行去吸呢個步驟其實對懶人嚟講已經係最大嘅恩物。
____
追蹤 AD研究所 即時動態⬇︎
YouTube ☛ https://buy.audiencedigest.info/youtube
Instagram ☛ https://instagr.am/audiencedigest
Facebook ☛ https://fb.me/audiencedigest/
____
橫評系列都係自費，連贊助產品都唔接受，所以橫評後產品都會賣出來幫補家計，入來望下睇下啦喂！
橫評系列：https://buy.audiencedigest.info/review
樣品發售：https://buy.audiencedigest.info/sample
____
主持：CLONG
撰稿：CLONG
拍攝：KAI
剪接：KAI
____
#AD家庭電器系列
#AD智能家居系列
#AD選購指南 #買前必看 #懶人包
#廣東話 #AD研究所 #吸塵機 #吸塵機械人
